Афіцыйна суму хабару не называюць. Сьведкі сьцьвярджаюць, што апэратыўнікі на месцы злачынства больш за гадзіну здымалі кожную даляравую купюру на відэакамэру.

Затрыманьне адбылося напярэдадні выходных на Смаргонскім рынку побач з харчовым павільёнам на вачах у шматлікіх сьведкаў. Начальніка раённай падатковай інспэкцыі Міхаіла Качура затрымалі пасьля таго, як ён ужо ўзяў грошы ад аднаго з прадпрымальнікаў. Пракурор Смаргонскага раёну Мікалай Маліноўскі пацьвердзіў факт затрыманьня Міхаіла Качура, але аб прычынах размаўляць адмовіўся:

(Маліноўскі: ) “Вы ведаеце, па тэлефоне я гэтага не магу гаварыць”.

Сёньня Міхаіла Качура няма на працы. Сакратарка адказвае, што нічога ня ведае, намесьніца начальніка падатковай інспэкцыі Ірына Карабінская таксама адмовілася адказваць:

(Карабінская: ) “Я нічога ня ведаю, без камэнтароў”.

Падчас затрыманьня Міхаіла Качура на рынку было шмат людзей. І калі апэратыўнікі прымусілі Качура дастаць з кішэні грошы, а потым кожную купюру здымалі на стужку, за гэтым назіралі сотні вачэй. Дарэчы, некаторыя людзі нават пазалазілі на плот. Вось што распавядае адна са сьведак падзеі:

(Спадарыня: ) “Факт тое, што кожную купюру фільмавалі, і я бачыла гэта. Потым пайшлі паглядзелі нашы супрацоўнікі, і ўвесь час гэта здымалі. Гэта значыць, што фільмавалі цэлую гадзіну. Відаць, купюраў было шмат”.

Сьведкі, якія сачылі за гэтым, адзначаюць, што Качура цяжка было пазнаць:

(Спадарыня: ) “Ён надта выглядаў, ведаеце, вельмі шэрым, як ягонае паліто. Такім шэрым выглядаў і твар”.

Неафіцыйна відавочцы падзеі сьцьвярджаюць, што апэратыўнікі сканфіскавалі ў Міхаіла Качура 12 тысяч даляраў.